MS
राजकीय वारसा नसणाऱ्या सक्रीय कार्यकर्त्यास मिळणार संधी
www.janvicharnews.com
नवी दिल्ली – 2024 च्या लोकसभा निवडणुकीत घराणेशाही-कुटुंबवाद हा मोठा निवडणूक मुद्दा बनवण्याच्या तयारीत भाजप असून आगामी विधानसभा निवडणुकीत पक्ष ‘एक कुटुंब, एक तिकीट’ हे सूत्र टप्प्याटप्प्याने राबवणार आहे. पुढील सार्वत्रिक निवडणुकीपर्यंत पक्ष यासाठी कठोर नियम बनवेल. हा मुद्दा उपस्थित करण्यापूर्वी पक्षाला पक्षांतर्गत दुरुस्त्या करायच्या आहेत. पक्षाच्या सूत्रांचे म्हणणे आहे की, गेल्या लोकसभा निवडणुकीत विजय मिळवल्यानंतर पंतप्रधान मोदींनी पक्षाच्या उच्चस्तरीय बैठकीत अनेकवेळा घराणेशाही-कुटुंबवाद राजकारणाविरोधात मोठी मोहीम सुरू करण्याबाबत बोलले होते. नुकत्याच झालेल्या अनेक विधानसभा निवडणुकीत याचा फायदा पक्षाला झाल्याचे त्यांचे मत आहे. यामुळेच त्यांनी अलीकडच्या सर्व कार्यक्रमांतून कुटुंबवादाच्या राजकारणावर जोरदार प्रहार केले आहेत.
www.janvicharnews.com
आगामी विधानसभा निवडणुकीत अनेकांचे तिकीट कापणार
मात्र, भाजपमध्ये अपवाद म्हणून एका कुटुंबातील एकापेक्षा जास्त सदस्य राजकारणात आहेत. काही कुटुंबांचे विधानसभेत तसेच लोकसभेत प्रतिनिधित्व आहे. ही व्याप्ती फारच मर्यादित असल्याचे पक्षाचे मत असले, तरी ते आणखी मर्यादित करण्याचा मार्ग तयार केला जात आहे.याशिवाय पक्षात कुटुंबवादाला महत्त्व न मिळाल्याची अनेक उदाहरणे आहेत. उदाहरणार्थ, लालकृष्ण अडवाणी, मुरली मनोहर जोशी, अरुण जेटली, सुषमा स्वराज, अनंतकुमार यांच्या कुटुंबातील एकही सदस्य राजकारणात नाही.
www.janvicharnews.com
एक कुटुंब, एक तिकीट
आगामी लोकसभा निवडणुकीपूर्वी होणा-या गुजरात, हिमाचल प्रदेश, मध्य प्रदेश, राजस्थान आणि छत्तीसगड विधानसभांमध्ये ‘एक कुटुंब, एक तिकीट’ या सूत्रावर काम केले जाणार आहे. यानंतर आगामी लोकसभा निवडणुकीसाठीही त्यानुसार मार्ग आखला जाणार आहे.
www.janvicharnews.com
नुकत्याच झालेल्या विधानसभा निवडणुकीपासून सुरुवात
नुकत्याच उत्तर प्रदेशसह पाच राज्यांमध्ये विधानसभा निवडणुका झाल्या. यामध्ये घराणेशाहीच्या राजकारणापासून दूर राहण्यासाठी पक्षाने पुढाकार घेतला. त्याच पार्श्वभूमीवर दिवंगत मुख्यमंत्री मनोहर पर्रीकर यांच्या मुलाला गोव्यात तिकीट नाकारण्यात आले. उत्तराखंडमधील अनेक जुने दिग्गज नेते आपल्या कुटुंबातील सदस्यांना तिकीट मिळवून देऊ इच्छित होते, परंतु पक्ष नेतृत्वाने ऐकले नाही.
www.janvicharnews.com
प्रादेशिक पक्षातील घराणेशाही
खरे तर डावे पक्ष, जेडीयू आणि आम आदमी पक्ष वगळता अनेक पक्षांची कमान कुटुंबातील दुसऱ्या, तिसऱ्या पिढीकडे आहे. काँग्रेसवर अनेक दशकांपासून कौटुंबिक राजकारणाचे आरोप होत आहेत. त्याचबरोबर DMK, YSR काँग्रेस, TDP, तेलंगणा राष्ट्र समिती, BSP, SP, RJD, BJD, तृणमूल काँग्रेस, NCP, शिवसेना, अकाली दल, JD सेक्युलर, INLD, RLD, PDP या सर्व पक्षांवर कुटुंबाचे नियंत्रण आहे.